Tirana do të jetë sot në qendër të vëmendjes me zhvillimin e koncertit të reperit me famë botërore Kanye West (Ye), një aktivitet që pritet të mbledhë mijëra pjesëmarrës në zonën e Kasharit. Për të garantuar sigurinë dhe mbarëvajtjen e këtij eventi, Drejtoria Vendore e Policisë Tiranë ka hartuar një plan të posaçëm masash, i cili parashikon kufizime të përkohshme të qarkullimit në disa nga akset kryesore të kryeqytetit.
Sipas njoftimit zyrtar, kufizimet do të zbatohen në disa faza përgjatë ditës, ndërsa qytetarët këshillohen të planifikojnë paraprakisht lëvizjet e tyre dhe të shmangin zonat ku do të ketë fluks të lartë automjetesh dhe pjesëmarrësish.
Nga ora 07:00 deri në 24:00, do të ndalohet qarkullimi në aksin dytësor të autostradës Durrës–Tiranë, në segmentin nga zona e “Eiffel” deri te “Casa Italia”. Ky segment do të jetë i aksesueshëm vetëm me sens daljeje për subjektet që ushtrojnë aktivitet ekonomik në këtë zonë. Po gjatë këtij intervali kohor, do të bllokohet edhe korsia e daljes së autostradës Durrës–Tiranë në rrethrrotullimin e “Casa Italia”, duke sjellë ndryshime të rëndësishme në qarkullimin e automjeteve.
Në një fazë të dytë, nga ora 12:00 deri në 24:00, kufizimet do të zgjerohen edhe në akse të tjera. Nuk do të lejohet qarkullimi në segmentin “Casa Italia” – rruga “Pavarësia” – rruga “Sokrat Miho”, si dhe në segmentin rruga “Sokrat Miho” – rruga “Kasem Shima” – rruga “7 Nëntori”. Ky i fundit do të jetë i hapur vetëm me sens daljeje, me qëllim lehtësimin e lëvizjes së automjeteve nga zona ku do të zhvillohet koncerti.
